Saturday, July 11, 2015

සකල සිරින් පිරි සිරි ලංකාවේ දේශප්‍රේමය

ලෝකෙන් උතුම් රට යැයි අප විසින්ම විරුදාවලී පටබැඳගෙන තිබෙන සහ "ප්‍රජාතාන්ත්‍රික සමාජවාදී ජනරජය" නම් වූ ලොවෙත් නැති විකාරරූපී විශේෂණ පදයෙන් නිල වශයෙන් හඳුන්වාගනු ලබන, සකල සිරින් පිරි මේ සිරි ලංකා දූපත, ඒ මේ කොයි ආකාරයෙන් වර්ණනා කර ගනු ලැබූයේ වුවද, අවසාන විග්‍රහයේ දී අන් කිසිවක්වත් නොව හුදෙක් ගෝත්‍රික දූපත් රාජ්‍යයක් පමණක් ම වන්නේ යැයි මා කියන විට මගේ මිත්‍ර අසන්නන් යටි ඇසින් බලා ඔරවන්නේ, තුන් වරක් බුද්ධ පාදස්පර්ශයෙන් පවිත්‍ර වී යයි ඔවුන් අදහාගෙන සිටින සහ, මිලියන 33,000 ක දේවතා- ආරක්ෂක බලකායකගේ නිරන්තර සුපරීක්ෂණය සහ ආරක්ෂාව යටතේ ඇතැයි කියනු ලබන මේ තාම්‍රපර්ණී දේශය, මසැසට කෙසේ පෙනුණ ද, මනැසින් නම් තාවතිංස විමානයක් සදිසි ව ගෙන ත්‍රෛයිලෝක විජයපත්‍ර පන්නයේ ආතල් එකක් ගැනීමට කුඩා වියේ සිටම උන් හැම පුරුදු කරවනු ලැබ ඇති බැවිනි.

හාත්පසින් ම මහා සයුරින් වට වී ඇති මේ කොදෙව් රාජ්‍යයේ උපදින, ජීවිත කාලයටම ඉන් ඔබ්බට පය නොතබා එහි ම නැසී යන මේ හුදී ජන බහුතරය, සකල සිරින් පිරි සිරි ලංකාව ලෝක ගෝලයේ හරි මැද පිහිටා ඇතැයි ද, පෘථිවිය පමණක් නොව සමස්ත විශ්වයම ඒ වටා පරිභ්‍රමණය වෙමින් පවතිතැයි ද අවිඥානිකව ම කල්පනා කරති.

මේ මතයන්ට පදනම් වන බහුබූත සංකල්ප වැඩි වශයෙන් ම පෝෂණය කර වගා දිගා කරන්නේ ජනගහනයෙන් 6% ක් පමණ වන, "බස් බෝඩ් කියැවීමේ සාක්ෂරතාවය" අහිමි, එබැවින් නූගත් යැයි සලකන මිනිසුන් නොව,  "පරිගණක සාක්ෂරතාව" හිමි සහ, එනිසා ම අන්තර්ජාලයටත් සමාජ ජාල මාධ්‍යටයත් ප්‍රවේශය ලබා ඇති, ලූලන් නැති වලේ සිටින උගත් කණයන් පිරිසකි.

මේ පිරිස ට අනුව නවීන විද්‍යාවේ සියලු ම සොයා ගැනීම් නම්, "හෙළයන්" විසින් වසර දහස් ගණනකට එපිට නිපදවා පාවිච්චියට ගත් තාක්ෂණය මෑතක දී බටහිරයන් විසින් සොරා ගැනීමේ ප්‍රතිඵලයන් ය. විදේශිකයන් දිවා රෑ නොතකා තවමත් කල්පනා කරමින් සිටින්නේ අපටවත් සොයා ගන්නට බැරිව මෙහි වැළලී ඇතැයි කියන රාවණාගේ පුෂ්පක විමානය ඇතුළු ඉතිරි තාක්ෂණික රහස් ටිකත් සොරා ගැනීම පිණිස සකල සිරින් පිරි සිරි දූපතට ගේම දෙන ක්‍රමයකි. අන්තර්ජාතික මූල්‍ය අරමුදලත්, ලෝක බැංකුවත්, ජිනීවා මානව හිමිකම් කොමිසමත් ඇතුළු එකි මෙකී නොකී සියළුම සංවිධාන මේ මහා සැළැස්මේ අතකොළු වෙති!

සමහර විටෙක, ඈත වැව් පිටියක ජපන් නිකොන් කැමරාවක් අටවාගෙන කොකුන්ගේ පින්තූර ගන්නා දේශප්‍රේමියකුගේ පින්තූර මත හිටි හැටියේ රාවණාගේ දඬුමොනරය පාදුර්භූත වෙයි. මා වැනි අමන දේශද්‍රෝහීන් මේවා දුටු විට මේ නම් කැමරාව ඉදිරියේ තණකොළපෙත්තෙකු චලනය වීමෙන් ඇති වූ ඡායාවක් යැයි කියා "බටහිර යුදෙව් චින්තනය" අනුව සිදුවීම පැහැදිළි කරන්නට ගියහොත් ඒ  පැහැදිළි කළ එකාගේ අම්මා මෝ ට ද නිවනක් නැතිව යයි.!!!

මේ ස්වෝත්තමවාදීන් කියන කරන කෙරුම් පමණක් ම දකින, බැහැර ලෝකය අන් ඇසකින් නොදකින කෙනෙකුට නිසැකවම හැඟී යනු ඇත්තේ ඇමරිකාවේ බැරැක් ඔබාමා,  නිදි වර්ජිතව, ඇඳ විට්ටමට කොට්ටයකුත් තබාගෙන ඊට බර දී,  සිරි දූපකට අඹරන හැටියක්  ම සිතමින් දිනක් නොහැර රැය පහන් කරන හැටිය කි.

"හෙළයන්" ගේ මේ අවිද්‍යාවෙන් අන් කවරෙකුටත් වඩා අපමණක් ප්‍රතිලාභ ලබන්නේ දේශපාලකයන් ය. පපුවට දෑතින් ම තඩි බා ගනිමින් මේ උතුම් භූමිය වෙනුවෙන් පෝරකයට වුවත් යෑමට තමන් සූදානම් යැයි බෑඟිරි දෙන විට චූන් වන හුදී ජනතාවක්  ඔවුන් වෙනුවෙන් නිරිමාණය කර දීමට මේ ස්වෝත්තමවාදය අපමණ පිටුබලයක් වෙයි. බස් බෝඩ් කියැවීමේ හැකියාව නිසා "සාක්ෂරතාවය" ඇතැයි එක්සත් ජාතීන්ගේ සංවිධාවය විසින් බෞතීස්ම කරන ලද, අකුරු මිස අකුරු පසුපස ඇති යථාර්ථය නොදකින මේ බහුතරයක් වන මිනිස්සු, තමන් අසන දකින දේ අන්ධ භක්තිකව විශ්වාස කරති.

ඇමරිකාවෙන් පැමිණ විදුලි පුටුවට කුදලාගෙන ගියත් බය නැති බව පවසන දේශපාලකයා, සිය රටේ අල්ලස් කොමිසමෙන් කැඳවූ විට යන්න බෑ කියමින්, තම්බි ගෙන යන්නට හදන වයිරා මෙන් කුර හතර බිමට ඔබාගෙන ඇස් උඩ ඉන්දාගෙන පස්සට අදින්නේත්, එවිට ඔහු වට කර ගත් අනෙක් දේශපාලුවන් රැළ රටම දෙවනත් වන්නට උම්බෑ කියන්නේත් ඇයිදැයි සිතීමට, මේ නිසා උහු යුහුසුළු නොවෙති.

දේශමාමක දේශපාලකයන් ගිරිය පුප්පාගෙන පොළවේ පස් කමින් ඇමරිකාවට අභියෝග කරන්නේ ඇමරිකන් කාරයන් සිය උතුම් මාතෘ භූමිය ට ඇඟිල්ලක් හෝ තැබුවොත් අල්ලා පරසක්වල ගසන තරම් රණකාමී ආවේගයකින් වුවත්, ඔවුන්ට යන්තම් මුත්‍ර අඩස්සියක් හැදුණු වහාම දුවන්නේ කොළඹ මහ රෝහලටවත්, අඩු තරමින් බෙයිජිං, හවානා හෝ මොස්කව් හි රෝහලකටවත් නොව ඇමරිකාවෛ් බොස්ටන්  නුවරක රෝහලකට බව ඔවුන්  දෙවියන් සේ අදහා වැඳුම් පිඳුම් කරන අන්ධ අනුගාමික හුදී ජනයා නො දකියි, නො සිතයි.

 දේශප්‍රේමයේ සුදු ාරද්දෙන් වසාගෙන මොවුන් යටි මඩි ගහන රටේ ජාතික ධනය යනු තමන් ද ඇතුළු රටේ සමස්ත ජනගහනයගේ ම ප්‍රයෝජනය පිණිස ඇති, ඒ ජනයා විසින් ම ඉපැයූ හෝ  පිටරටින් ණයට ගත්, නූපන් දරුවන් ද ඇතුළු වර්තමාන සහ අනාගත සමස්ත පර්ම්පරාවන් විසින් ම වගකීම දරන  වත්කම් බව "රාවණාගේ දඬු මොණරය" පරිස්සම් කර ගන්නට වලි කන දේශප්‍රේමී ජනතාව සළකන බවක් නො පෙනේ.

බල්ලන් සුව පහසු මෙට්ටයක් මත නිදන්නට ගියත් නින්දට යන්නට පෙර එක තැන වටයක් දෙකක් කැරකෙන්නේ අතීතයේ වනගත ව විසූ උන්ගේ මුතුන්මිත්තන් වනයේ කොළ රොඩු සමතලා කොට යහන තනා ගැනීම පිණිස කරන ලද කුියාවේ නෂ්ඨාවශේෂයන් වශයෙනැයි සත්ත්ව විද්‍යාඥයෝ කියති.

මධ්‍යකාලීන ලංකාවේ කුල ධූරාවලිය මත පදනම් වූ වැඩ වසම් සමාජ ක්‍රමයක් තිබිණැයි ද, උසස් කුලවතුන් නිවෙසට රැය පහන් කරන්නට පැමිණි විට එම කුලවතාට කෙරෙන අගන්තුක සත්කාරයනක් වශයෙන් සිය බිරිඳ හෝ වැඩි විය පත් දියණියක් ඔහු සහග රැය පහන් කරන්නට ඔහු ගේ සයනාගාරයට යැවීමේ සිරිතක් එකල විනැයි ද මෙරට පුරාණ සමාජය ගැන පර්යේෂණ කළ උගත්තු කියති.

මේ රටේ ‍ඊනියා දේශප්‍රේමීන්ගේ පසුපස වන්දනාවේ යන හුදී ජනයාගේ චින්තනය පැහැදිළි කළ හැක්කේ සත්ත්ව විද්‍යාවෙන් සහ සමාජ විද්‍යාවෙන් ගත් මේ තියරි දෙක හයිබ්‍රිඩ් කිරීමෙන් පමණ කි.

Thursday, July 9, 2015

කී දේ කළ අපේ අතිගරු නොවන ජනපති

අපේ අතිගරු නොවන ජනාධිපති මෛත්‍රීපාල සිරිසේන මහතා රට කළඹන වික්‍රමයක් කර තිබේ. එය, ගිය දෙසැම්බරයේ දී ඒමහතා අපේ හිටපු ජනාධිපති රාජෝත්තමයා‍ණන් වෙතින් ආප්ප සප්පායම් වී පැමිණ ඊට පසුදා එතුමාණන්ගේ ම ප්‍රතිවාදියා ලෙස තරඟ බිමට බැසීමෙන් පාන ලද්දා වූ මහා වික්‍රමයට පසුව ඔහු විසින් කරන්නට යෙදුණ ලොකුම වික්‍රමය ද වෙයි. දැන් මේ ශ්‍රී දූපතේ සිටින තනේ කටින් නොහැරියා වූ පොඩි එකා පවා දන්නා පරිදි අපේ අතිගරු නොවන ජනාධිපතිතුමා, එතුමා ට ඡන්දය ප්‍රකාශ කළ ඡන්දදායකයන් 62 ලක්ෂයක් විසින් පසුගිය ජනවාරි 08 වැනි දා පරාජය කරන්නට යෙදුණ හිටපු ජනාධිපති රාජෝත්තමයාණන්ට එළැඹෙන පාර්ලිමේන්තු මැතිවරණය තරඟ කිරීම පිණිස නාම යෝජන‍ා දෙන්නට තීන්දු කර ඇත. මේ තීන්දුව නිසා, එතුමා පෑ පළමු වික්‍රමයෙන් සාතිශය සංවේගයට පත්ව සිටි 58 ලක්ෂයක ජනතාවක්අද දින වන විට පස්වනක් ප්‍රීතියෙන් පිනා ගොස් ඇති අතර, එදා ඒ වික්‍රමයෙන් ප්‍රමෝදයටත් ආනන්දයටත් පත් ව සිටි බහුතර ජනතාව අශ්වයා මළ කව් බෝයිලා ගේ තත්ත්වයට ප ත් ව සිටිති.

එනමුත් හිටපු ජනාධිපති රාජෝත්තමයා‍ණන් ට නාම යෝජනා ලැබීම කිසිවෙකුටත් පුදුමයට හෝ කණගාටුටව හෝ පත් වන්නට තරම් කරුණක් නොවේ. ඇරත්,  මේ නාමයෝජනා අවස්ථාව අපේ අතිගරු නොවන ජනාධිපතිතුමන් විසින් හිටපු මහ රාජෝත්තමයාණන් වෙත සලසා දෙනු ලැබීම සඳහා කරුණු යෙදී ඇත්තේ, බහුතර ජනතාව ලත් ජනවාරි විජයග්‍රහණය තුළින් ජනපති පදවි ලැබීමෙන් පසු  ඒ මහතා සන්ධානයේ නායකත්ත්වයට ද පත් වූ බැවින් ය. නොඑසේව, එතුමා ජනාධිතිවරණයේ දී ජනතාවට පිළිණ දුන්නා වූ පරිදිම ජයග්‍රහණයෙන් පසුවත් නිර්පාක්ෂිකව සිටියේ වී නම්, අදත් සන්ධානයේ කෙරුමා හිටපු මහරාජෝත්තමයාණන් ම ය. එසේ වී නම්, ඒත් එතුමාණන් වහන්සේ මේ මහ මැතිවරණයට සංධානයේ අගමැති අපේක්ෂකයා ලෙස ඉදිරිපත් වන්නේ ම ය.

එහෙත්, 62 ලක්ෂයක් ජනතාව වික්ෂිප්ත කළ කරුණ එය නොව, මෙය‍‍ට දින 180 කට පෙර සිටි දිශාවෙන් අප අතිගරු නොවන ජනාධිපතිතුමා මේවන විට අංශක  180 ක් ම කැරකි සිටීමය.  එහෙත් එය ද එතුමා එතුමා ගේ ප්‍රතිපත්ති යෙන් බැහැර වීමක් සේ සැළකිය හැකි ද නොවේ. එදා ආප්ප සංග්‍රහය භුක්ති විඳ නික්ම ආ දින සිට අපගේ අතිගරු නොවන ජනාධිපතිතුමා   ගෙවා ආ ගමන් මග විමසිල්ලට ලක් කළොත්, ඒ මුළු කාලයේ ම  කළ කී කිසිවක්  ම සඳහා කිසිදු ප්‍රතිපත්තියක් ඇති ව නොසිටි ඒ මහතා, මේ මැතිවරණ නාම යෝජනා තේරීම සඳහා  පමණක් ප්‍රතිපත්තියක පිහිටා කටයුතු කරනු ඇතැයි හුදී මහජනයා විසින් සිතීම කෙතරම් අයුක්ති යුක්ත ද?

කෙසේ වෙතත් මේ සිද්ධි දාමයෙන් එකක් නම් තහවුරු කෙරී තිබේ. ඒ නම්, සිරිසේන මහතා එතත් කියා අනිකක් කරන ජාතියේ අයෙකු නොවන බව ය. ජනාධිපති ලෙස පත් වූ විගසම ඒ මහතා කීවේ තමා අතිගරු ජනාධිපති ලෙස හැඳින්වීම අනවශ්‍ය බවයි. මේ කීම ඒ හැටියෙන් ම පිළි නොගත්, නායකයන් දේවත්වයට ඔසවා තබා ඔවුන්ගේ සපත්තුවේ පහසත්, සබුක්කුවේ පහරත් ලබන්නට සහ  ඒ නායකයන්ගේ ම ප්‍රශස්තිය රෙදි නැතිව ගයන්නට හුරු ව සිටි අපේ වහල් ජනතාව දිගින් දිගට ම තමා අනුමත නොනකරන ඒ නුසුදුසු විරුදාවලිය තමාට ආරෝපණය කරන බව  දුටු ඒ අවංක මහතා, දැන් තමා අතිගරු නොවන ජනාධිපති කෙනෙකු බව ක්‍රියාවෙන් ම ලෝකය හමුවේ ඔප්පු කර පෙන්වා ඇත! තවත් ඉතිං රෙදි ඇඳගෙන කියාපල්ලකො අපේ “අතිගරු“ ජනාධිපති කියලා!!!!

කෙසේ නමුත්, මේ සියල්ල අවසානයේසිදුවී ඇත්තේ, පැය 24 සිංහල, හඳේ හාල්, ඇට අට, 3.50 පාන්, ආසියාවේ ඓශ්චර්යය ආදී කැරට් අල වළඳමින් එකතැන කැරකෙන්න ට හැට වසරක් තිස්සේඉරණම් කොට සිටින ජනතාවක්  යහපාලන ගුලියත් වළඳා, තවත් වටයකින් හිටි තැනටම ආපසු අවුත් ඇටි කෙහෙල් කෑ උගුඩුවන් සේ බලා සිටීම ය.

මේ රටට " ද ලෑන්ඩ් ලයික් නෝ අදර්" කියා කී එකාගේනම් කටේ  එබිය යුත්තේ මසුරන් නොව රෙන්මින්බි ය!!



Sunday, February 1, 2015

ඒ ඒ බනිස් වලට ලැබෙන ඒ ඒ කෙසෙල්ගෙඩි

අපේ රටේ ජනතාව තමන්ගේ මැම්බර් ප්‍රජාව කෙරෙහි එතරමි ම මනාපයක් නැත. එයට හේතු කාරණා ලෙස නහුතයක් දේ ගෙන හැර පානු ලැබේ. දැන් දැන් මැම්බර්ලා අතර කුඩු කාරයෝත් එතනෝල් කාරයෝත් ඉන්නා බවද කියති. මැම්බර්ලාගෙන් බහුතරය  නිසැකව ම නමගිය චණ්ඩි වෙති. තමන්ගේ නමට නඩු හත අටක් වැටී නැති දෙතුන් වතාවක් හිරේ ලැග නැති මිනීමැරුම් දෙක තුනකටවත් නම ගෑවී  නැති මැම්බර් කෙනෙක් මැම්බර් කෙනෙක් යැයි නොසිතෙන තරමට මේ කාරණා මැම්බර් ප්‍රජාවට සාමාන්‍යකරණය වී ඇත. මැම්බර්ලා පොලීසියට චණ්ඩි පාට් දාන බවත්, ඒ නිසා නීතිය වල් වැදී ඇති බවත් කියනු ලැබේ. පත්වීමක් මාරු වීමක් ගැනීමේ දී මැම්බර්ලා ගේ අත පෙවීම් නැති තැනක් නැතැයි කියමින් ඡන්දදායකයෝ හූල්ලති.

ඉතින් හත්වලාමේ, මේ මැම්බර් මහත්වරු මේ තරම් භයංකර සත්ත්ව විශේෂයක් බවට පත් වන්නේ මක් නිසා ද?

මේ ගැන සොයා බැලීමට නම්, චණ්ඩි කම් නොකරන, නීති ගරුකව කටයුතු කරන, මනමාලකම් නැති සාන්ත දාන්ත තීන්ත කූඩුවක් බඳු වූ පරමාදර්ශී මහතෙකු ආදර්ශයක් ලෙස සොයා ගත යුතු ය. අපගේ අතත්‍ය (Virtual) ලෝකයේ සිටින මේ  මහතා ඡන්දයකට ඉදිරිපත් කර මැම්බර් මහතකු බවට පත් කළ යුතු ය.

මෙවැනි අහිංසක මැම්බර් මහතකු සිය දේශපාලන ජීවිතය අරඹා ටික කලක් යන විට ඔහුගේ ඡන්දදායක මහත්වරු මහත්මීහු ඔහු සොයා එන්නට පටන් ගනිති. සමහරවිට මහ රෑ ගෙදරට දුව එන අම්මණ්ඩි කෙනෙක් මෙසේ කියනු ඇත. “මගේ මිනිහ පොලීසියෙන් අල්ලං ගියා මහත්තයෝ...අනේ මගේ මිනිහ බේරල දෙන්න මහත්තයෝ“ ඉතින් අපේ මැම්බර් මහත්තයා පොලීසියට කතා කරයි. “හෙලෝ...ඕ.අයි.සී. මහත්තයා ද....මොකද අර සයිමන් කියල කෙනෙක්....ආ....ඔව් මිනියක් මරලා....සාක්කි තියෙනවා ...ඔව්.. ...නෑ...එහෙනම් කමක් නෑ...රාජකාරිය කරන්න..ගුඩ් නයිට්“ ඉන් පසු එතුමා අර අම්මණ්ඩිට මෙසේ කියයි....“ඔය නෝන මහත්තයගෙ මහත්තය පොලීසියෙන් ගෙනිහින් තියෙන්නෙ මිනී මැරුමකට සැක පිට...සාක්කි ඇතිව...ඉතින් පොලීසියෙ රාජකාරියට අපට මැදිහත් වෙන්න බෑ නෙව...උදේට යන්න පොලීසියට. ..උසාවියට දැම්මම ඇප දීල ගන්න පුළුවන්ද කියල බලන්නකො“

මේ ආකාරයට ළමයි ඉස්කෝලෙ දමා ගැනීමට, රස්සා වලට ලියුම් ගැනීමට, මාරුවීම් හදා ගැනීමට, වැලි ලයිෂන්, බාර් ලයිෂන් ගැනීමට ආදී වූ දහසකුත් එකක් කාරණාවලට එතුමා සොයා එන  නහුතයක් ඡන්දදායක මහජනයාට කියන්න වෙන්නේ ද මෙවැනිම කතා ය.

දැන් අපේ මේ පරමාදර්ශී මැම්බර් මහතා ඊළඟ ඡන්දයට ද ඉදිරිපත් වේ. දැන් ඡන්දදායකයන්  කුමක් කියනු ඇත් ද?

“අපොයි ඔය මිනිහ කවුන්සලේට ඇරල මක් කොරන්න ද? මගේ මිනිහ පොලීසියෙන් ගෙනිච්ච වෙලාවෙ ඔය පතෝලයට බැරි වුණා මිනිහ එළියට ගන්න...අන්න ඒකට කලින් හිටිය මැම්බර් .රත්තරන් මහත්තයා...පොලීසියට ගිහින් ඕ අයි සීට කුණුහරුප දෙකයි කිව්වේ...මිනිහා එළියේ..“

“ හැබෑම තමා...අපේ පොඩි එකා මහා විද්‍යා ලෙට දාල දෙන්න ඔය මිනිහට කිව්වම බෑ කිව්වනේ..ඔය වගේ වැඩක්වත් කරවගන්න බැරිනම් මොකටද ඔය මිනිහට ඡන්දෙ දෙන්නේ“

අවසානයේ සිදුවන්නේ අපේ පරමාදර්ශී මැම්බර් මහතා හිටපු මැම්බර් වී කලින් හිටි චණ්ඩි මැම්බර් බලයට පත් වීමයි.

මැම්බර්ලා පත් වන්නේ ඡන්දදායකයන්ගේ ඡන්දයෙනි....මැම්බර්ලා යනු ඡන්දදායකයන්ගේ ම පිළිබිඹු වෙති.

ඒ ඒ බනිස් වලට  ඒ ඒ කෙසෙල්ගෙඩි යැයි කියන්නේ කට කහනවට නොවේ.



කළගුණ සැලකීම

කළගුණ සැලකීම සත් කාර්යයක් වශයෙන් අපට කුඩා කල පටන් ම උගන්වා තිබේ. තිලොවග තිලක බුදු පියාණන් වහන්සේ බුදු බවට පත් වූ වහාම මුලින්ම කළේ තමන්ට බුදු වීමට සෙවණ දුන් බෝ රුක දෙස හත් දවසක් පුරා ඇසි පිය නොහෙළා බලා සිටීමෙන් කළ ගුණ දැක් වීම යි. ගසකට කළ ගුණ දැක්වීමට වෙන ක්‍රමයක් නැති බැවින් උන් වහන්සේ එසේ කරන්නට ඇත. ඉන් පසු උන් වහන්සේ තමාගේ මුල් ගුරුවරුන් සොයා ගෙන තමා අවබෝධ කර ගත් දහම එතුමන්ලාට දෙසීමට වැඩම කළේ ද කළගුණ දැක්වීම පිළිබඳ අමතක නොවන ආදර්ශයක් අපට දෙමිනි.

මෙසේ කළගුණ සැලකීම පිළිබඳ ආදර්ශ දහසක් අසමින්, කළගුණ සැලකීම අගය කරන සමාජයක හැදෙන වැඩෙන අපි දු කළගුණ සැලකීමට හුරු පුරුදු වීම අරුමයක් නොවේ. මේ පුරුද්ද නිසා අපි හැම විටම බලන්නේ අපට උදව් කළ අයෙකුට පෙරළා කළගුණ සලකන්නට ය.

ඉතින් අපි රස්සාවකට ගියත්, කවුන්සිලේට ගියත් කොහේ හෝ යමක් කමක් කර ගන්නට හැකි තැනකට ගිය වහාම කළගුණ සලකන්නට පටන් ගන්නෙමු. හැකි හැකි අයුරින් හත්මුතු පරම්පරාවටම එසේ සලකන්නෙමු. මෙය වැරදි විදියට දකින අය එයට ඥාති සංග්‍රහය යැයි නමක් පටබැඳ නිග්‍රහ කරති. මෙය ඉන්තේරුවෙන්ම වැරදි කතාවකි.  කළගුණ සැලකීමට ඥාති සංග්‍රහය යැයි කියා අපහාස කරනවුන් උන්ගේ අදහස හරි යැයි කියන්නට ගෙනෙන තර්කය වනුයේ එසේ කළගුණ සලකන්නේ සලකන්නවුන්ගේ බූදලයෙන් නොවේ ය යන කාරණය යි. මේ තර්කය ගෙනෙනවුන් වැඩි දෙනෙක් අර මහතුන් මෙන් මහජන මුදලින් කළගුණ සලක්නට අවස්ථාව නොලද බහුතරයක් ඡන්ද දායක ගොයියන් ය.

එහෙත් මේ ඡන්දදායක ගොයියන් ද කළගුණ සැලකීම පිළිබඳ ව වූ කාරණයේ දී ඔවුන්ගේ විවේචනයට භාජනය වන අර මැම්බර් මහතුන් ට වඩා වෙනස් නොවන බව මට නම් හොඳටම විශ්වාස ය. ඒ ඇයි?

ඡන්දය දවසට මේ ඡන්දදායක ගොයියන් ඡන්දය දාන්නේ මොකටදැයි ඇසූ විට කියන්නේ කුමක් ද? රට බේරා ගත් නිසා එතුමාට කළගුණ සලක්නට ඡන්දය දෙනවා කියා ය. අපොයි රට බේරා ගත්තා වෙන්න නම් පුළුවන් හැබැයි ඊට පස්සේ රට උගස් තියලා හොරා කෑවා නේද කියා කවුරු හෝ කීවොත් අර ගොයියා කියන්නේ මොකක් ද? රට බේරා ගත් උත්තමයා ටිකක් කෑවම මක් වෙනවාද කියා ය.  එසේ කියා ගිය පණස්හත් ලක්ෂයක් ම උත්තමයාට කතිරය පූජා කළ හ.

ඉතින් අර මහජන මුදලින් කළගුණ සලකන මැම්බර්ලාත්, සිය උත්තරීතර ඡන්දයෙන් උත්තමයාට කළ ගුණ සැලකු ඡන්දදායකයාත් සමාන වෙන්නේ කොහාමදැයි ඔබ දැන් මගෙන් අසනු ඇත. ඕක දැන ගන්න නම් පොඩි පරීක්ෂණයක් කළ යුත්තේ ය.

රට බේරාගත් උත්තමයාට කළගුණ සලකන්ට යැයි පොඩි අරමුදලක් ආරම්භ කර, අර ඡන්දය දුන් ගොයියන්ගෙන් රුපියල් දෙදාහ ගාණේ එකතු කරන්න යන්න. ලක්ෂ දහයක්වත් දායකත්වය ලැබුණොත් පුදුමය. ඔය සල්ලි එකතු කරලා මොනව කරනවද කවුද දන්නේ ආදී වශයෙන් අරමුදලේ යහ පාලනය ගැන සංවේදී කම පෙන්වා වැඩි දෙනෙක් දායකත්වය මග හරිිනවා ඇත.

එහෙනම් අර ඡන්දදායක ගොයියන් ඡන්දයෙන් කළගුණ සලකන්නට නොපැකිළ ඉදිරිපත් වුණේ මන්ද?  ඡන්දයෙන් පත් වූ පසු උත්තමයා බිලියන් ගණන් කෑවත් ඒ කන්නේ මගේ සල්ලි නොව රටේ සල්ලි නිසා ය. අනුන්ගේ සල්ලි වලින් කළගුණ සැලකීම සහ තමන්ගේ සල්ලි වලින් කළගුණ සැලකීම යන කාරණයේ දී ඡන්ද දායකයන්ගේ හැසිරීමත් මැම්බර්ලාගේ ක්‍රියා කලාපයට වඩා වෙනස් වෙන්නේ නැති බව මා කියන්නේ එබැවිනි.

කට කහනවට කොටන මගේ ගංජා හේන

දිනපතා පුවත්පත් සහ රූපවාහිනී පුවත් බලන විටත්, ගුවන්විදිලියට සවන් දෙන විටත්, අන්තර්ජාලයේ  සහ මග තොට ද සැරිසරන විටත් දකින්නට  අසන්නට ලැබෙන නේක විධ දර්ශන ආරංචි ආදිය නිසා කියන්නට කටට එන, එහෙත් තහංචි නිසා කියන්නට බැරිව යන, ඒ බැරිකම නිසාම කට කසන්නට හේතු වන කතා කියන්නට අන්තර්ජාලයේ මේ පොඩි හේන කොටා ගත්තෙමි. මේ මගේ නියම අනන්‍යතාවයෙන් කෙටූ හෝ කොටන හෝ හේනක් නොවේ. නිර්නාමිකව හෝ, අනන්‍යතාවය වසංගමින් හෝ අන්තර්ජාලයේ පෙනී හිටින්නට මගේ කොහෙත්ම කැමැත්තක් නැත. මේ කාර්යය මෙතෙක් පමා වූයේත් මගේ ඒ අකමැත්ත නිසාම ය. ඒත්, මගේ නියම නමින් වෙබ් අවකාශයේ කොටා ඇති හේනේ වවා ගන්නට බැරි මේ කංසා පැල ටික කොහේ හෝ වවන්නටම ඕනෑ යයි ඇති වූ බලවත් අධිෂ්ඨානය නිසාම මෙය මෙසේ පටන් ගන්නට අවසානයේ මම තීන්දු කර ගත්තෙමි.

කංසා කියනනේ නරකට පාව්ච්චි කළොත් නරකට හිටින, එහෙත් හරි විදියට යොදා ගත්තොත් මහත් පල ආනිසසංස ගෙන දෙන ඹෟෂධයකි. ඒකට ත්‍රෛෙලා්ක විජය පත්‍රයැයි කියන්නේ නිකමට නොවේ.

ඉතින්,මගේ මේ හේනේ වවන බෝගයද බොහෝ දෙනෙකුගේ ත්‍රෛෙලෝක විජයට හේතු වේවායැයි පතමින් මේ හේන මම දැන් මෙසේ පුරන්නෙමි.